老翻專家日記簿

西安之旅既最後一日，沒有安排甚麼特別既景點… 今日只係去左西安博物館，小雁塔就完結左我地既衝景點之旅。

今日因為無咩野做既關係，我地真係好悠閒咁八點鐘起身，嘆早餐，九點半Check Out，搭返地鐵去尋日去過既小寨，起程去最後既景點，西安博物館。不過去完之後，先發現自己一日一柒了，今日柒左既係Mix Up左陝西博物館同西安博物館呀… 前者有超多文物睇，後者原來咩都無，哈哈。好彩既係，依度有小雁塔補返數。不過去完之後，我地都係o係塔下影相留念咋，因為無力登塔，同埋今日重點係去買手信…

返到鐘樓，去左回民街度買手信，包括皮影戲既裝飾，西安景點既木書簽，同埋兵馬俑筆，哈哈… 派剩皮影戲裝飾… 其實每份手信都好靚呀… 但無留一份比自己，可惜。

買完手信，買埋野食，搭機場巴士去機場… 坐飛機返香港，又Delay了一個鍾呀，救命。返到香港，行雷閃電，所以D行李又遲左一個鍾先運到行李帶上… 媽的。原本安排返教會小組既計劃中斷了，吃完麥當奴就返家了。

08:00 起床
08:15 早餐
09:30 Check Out
09:50 鐘樓地鐵站
10:10 小寨地鐵站
10:45 西安博物館
11:15 小雁塔
11:45 小寨地鐵站
12:05 鐘樓地鐵站
12:15 手信
13:15 機場巴士返西安機場
14:15 到達機場
15:45 飛機Delay
16:45 一飛衝天
19:45 到達香港
20:45 等到行李
21:00 巴士回黃大仙
22:15 麥當奴
23:15 回家

行程入面，第二個期待既地方，華山… 我來了，不是要找金庸筆下既令狐沖… 岳不群… 風清揚… 而係感受依座華山有幾陡峭險峻，哈哈，我輸了…

今日一早起身，經歷左兩日既早起身，我真係想再訓耐去呀，不過唔得呀，因為今日去華山呀，是重要景點呀。哈哈，所以縱然想睡下去… 但要堅持呀。六點鐘起身，六點半吃早餐，七點三十分衝上的士… 我們打算乘八時既D1002動車去華山… 但善意既拒載呀… 佢假稱去西安北站塞車呀，所以提議車我地去地鐵站轉地鐵去… 可能太早既關係， 中計了，結果我地On居居就落車，搭地鐵去北站… 不過唔熟路既關係，我地預計唔到搭地鐵可以搭咁耐呀，去到西安北站，都已經八點十五分了，開左車，我們遲到了… 感謝主，主既智慧實在太好了，雖然Miss左一班車，但我地懂得去改乘，換車票坐下一班車去華山，班車八點半開，感謝主，唔洗補$$$就可以解決問題。

車程只係四十幾分鐘，好快就去左華山北站，未出車站，原來已經有Official既Counter去華山遊客中心，唔洗搭的士去… 正！一程10蚊個，Just Okay啦… 之後10分鐘既車程，去到遊客中心，買好入場票 ($200)，車票 ($20一程)，又係酸奶作用既時候呀，哈哈，洗手間同樣好乾淨呀，五星級洗手間，感謝主。搭多程車，去到索道門口，再比$80坐欖車上華山，我地買左單程係因為在計劃中，我地會搭欖車上山，之後行晒五個峰再行古道落山呀…

我們坐欖車，首先坐到北峰，欖車幫我們慳返垂直七百多米既路程… 上到北峰山腰，我地首先就攻陷北峰山頂先，再同金庸論劍影下相，就一路咁去東峰，中峰，南峰，西峰進攻… 中間我地更加做左個危險動作，就係扣安全帶，鷂子翻身… 爬去左下棋亭。行勻晒咁多個峰，仲去左天下第一洞房度睇下… 原來都係一個普通山洞… 哈哈… 繼睇錯天下第一西之後，今次無去錯天下第一洞房，淫也… 不過真係枉稱天下第一呀，哈哈，沒有天下第一，我又不去，認做天下第一，又比人小… 真係難改名呀。

成個華山之旅，我地有如進入仙景，騰雲駕霧一樣，咩都睇唔到。幸好，越夜越有機呀… 中午過後，D雲開始消散，我地先開始親眼見到D山有幾峻峭，斜得有幾誇張。不過，o係未見到以先，我地由索道行上去北峰頂，已經感受到D山有幾鬼斜呀… 哈哈，攻第一個頂已經用盡體力了，感謝主，靠住意志，就可以行完五個峰呀。不過，因為我地行左六個幾鍾，先行晒五個峰返到索道站，加上體力完全透支，所以我地就一致決定坐返索道去搭車走人。

搭完架車… 發現佢地只係送我地去到公交車站咋，唔係一開始好靚果個遊客中心，好彩依度有一堆等住宰羊既的士大佬呀… 無牙力和體力之下，$30被宰運走我地去華山北站，哈哈。今次我地好好呀，無遲到了，早到一個鐘乖乖地等上車。

返到西安北站，我地搭地鐵去左小寨站。嘩，夜晚既地鐵好鬼慢呀，5分鐘一個站… 結果用左成粒鐘，先由北站去到小寨站… 夜媽媽，唸住搵野食，點知行o黎行去，都搵唔到事先預備既真愛餐館… o係無體力+肚餓既時候，仲要無方向，大獲。但思典從來無離開過，結果我地符碌地去左另一間預備左既乾州食府，去醫飽我地既五臟六腑呀。

食飽左，照搭地鐵返酒店… 雖然超累，但我們真係好捱得。哈哈

06:00 起床
06:30 早餐
07:30 的士去西安北站
07:40 鐘樓地鐵站
08:15 西安北站
08:30 上火車
09:15 華山北站
09:45 華山遊客中心
10:30 華山索道站
10:45 華山北峰察道站
17:30 華山北峰察道站
17:45 華山索道站
18:15 華山公車站
18:30 華山北站
19:30 上動車回西安北站
20:15 西安北站
21:00 小寨地鐵站
21:15 乾州食府
22:00 小寨地鐵站
22:15 北大街地鐵站
22:30 酒店

感謝主, 今日是恩典之日… 哈哈, 其實每次去旅行, 都有極大既恩典係當中, 只要搭飛機, 搭車平安, 無比人偷野, 無中計既時候, 已經要將極大既榮耀歸與神。

今日目標係去西線乾陵, 之後去法門寺; 第二個選擇係直接西線去法門寺, 第三個選擇係去東線兵馬俑… 目標都係衝景點, 哈哈!!!

一早起身, o係酒店食早餐, 令人期待已久既早餐呀, 都唔差, 幾豐富, 當然又唔夠上次去巴里住洲際酒店果個早餐咁正啦, 始終都差緊一粒星Ma!!! 不過依度既早餐, 都有好多選擇, 切好晒既生果, 仲有我最喜歡既肚柯乳酪, 薯餅, 例牌奄列, 腸仔, 火腿煙肉, 北歐麵包, 中式雲吞麵… 哈哈, 食到反肚呀!!!

食完之後, 休息左陣, 就行去火車站, 去搭旅遊大巴啦。感謝主, 去到既時候, 就可以搭去法門寺既大巴, Second Plan成功。八點九開車, 正規職員即時講解車程, 班次資料, 賣車票, 入場票。雖然普通話超級水皮, 但好彩做過下功課, 仍然聽到最早同最後班車既資料, 停車地點, 注意事項等等… 可惜, 我地聽左咁多野, 最後仍然帶住D危險, 坐上加班車離開法門寺, 哈哈。

坐左兩個鐘既車, 去到法門寺, 真係坐都坐到痴線呀… 一落車, 嘩, 點解咁浮誇呀, 好大好靚既現代建築, 噴水池, 仲有酒店, 金光閃閃成個天壇大佛咁既佛像… 成座高達咁… 同我想像中既法門寺點解差咁遠呢… 由入口行到個現代建築既大雄寶殿, 慢慢欣賞現代建築技術, 古代佛教歷史, 故事… 足足行左兩個鐘。根住我地先行去古寺, 真真正正既法門寺。

法門寺本身都千年歷史, 最古老既算係法門寺塔, 不過o係廿幾年前, 依座寺塔終於經歷唔到雨水沖刷, 倒塌左一半… 雖然無左件歷史建築, 但如果唔係座塔塌左, 我地都見識唔到收埋左千幾年既法門地宮, 入面收藏既唐代文物… 仲有四件, 無價真寶, 舍利子。

舍利子真係聽得多, 係佛教一件最勁既聖物, 咁究竟咩野係舍利子呢? 簡單講句, 舍利子就係佛教高憎既遺體火化後, 剩低既結間體。根據史書上指, 依四件舍利當中, 有一件係真身佛骨, 即係佛祖釋迦牟尼火葬後剩低既中指骨, 所以自八十年代後, 依度再一次成為佛教既聖地… 所以呢, 隔離既現代法門寺, 好明顯就係政府抽水之作啦, 挾住隔離法門寺既大名, 順手搭單起多舊野, 加完價再一齊賺錢。

四件舍利子, 依度全部拎晒出o黎比大家睇, 同埋添香油… 除左佛教文物外, 仲有好多唐代皇帝既文物o係入面, 好精緻既金銀器, 秘色碗碟, 琉璃器… 都顯示出唐代既International, 繁華一面, 同埋叱吒一時既霸氣。

睇多兩個鐘, 我地終於離開依度, 再花半個小時, 行返去出口, 三點半鐘出到去, 唸住搭四點班車返西安… 點知, 唉!!! 四點班車已經滿員了… 心唸仆街了, 真係要搭尾班車返去呀。最驚既係, 大陸人唔會排隊, 早到都無用啦, 咁即係話, 如果衝唔到上去尾班車, 係會無車離開法門寺嫁, 要比人掠水返西安… 結果, 我地就帶住好驚既心情去等車… 一如所料, o黎既人越來越多, 遠遠超過一班車既負荷, 當車o黎到, 班人又瘋湧上車… 結果我地都係上唔到依班車呀… 正當爆大獲之際… 不知所措既時候…

感謝主… 神真係唔會睇住我地比黑車宰嫁, 佢地開多架加班既旅遊大巴來, 將我地依班爭唔到上車既輸家裝返去西安, 感謝主, 由15:30擔心到17:00, 心裡祈禱, 但仍然有點不平安, 好疑惑… 到終於上到加班車, 感謝主呀。這就是恩典呀…

返到西安, 去左間蘭州拉麵店吃東西, 終於食左個羊肉泡膜… OK啦, 可以再吃… 不過我仲以為一個麵包, 自己一舊舊整出來浸湯, 誰不知道佢地幫我地切好晒粒粒, 放落湯度, 體貼左D, 但就無左個特色了, 哈哈。算啦, 食飽左唸住返酒店, 但被商場吸引住, 行左入去見識下西安既大型商場係點… 果然同香港一樣, 似新世紀廣場既格局呀, 走果陣, 仲柒到搵唔到出口, 哈哈!!! 搵左陣先搵到, 之後就行返酒店了, 行左同企左成日, 仲緊張左一陣, 真係累死了。

06:30 起床
06:45 早餐
07:30 回房間
07:45 步行去火車站
08:10 火車站
08:45 開車去法門寺
10:45 法門寺新翼
12:45 行完新翼
13:00 法門寺舊翼
15:00 行完舊翼
15:30 法門寺出口等車
17:00 上旅遊巴士回西安
19:00 西安火車站
19:30 火車站附近的蘭州拉麵店
20:15 新城廣場附近的大型商場
21:30 回酒店
21:45 酒店

今日終於出發去西安了, 事前做左好多功課, 由最基本的旅遊景點, 到基本歷史, 交通, 飲食等等, 都做左個調查, 務求唔好浪費這個恩典之旅。感謝主, 最開心既係唔洗坐東航飛機, 可以搭港龍飛機去西安, 岩岩復飛一個月咋, 哈哈。第二樣開心既係, 可以住o係差不多百年歷史既建築物, 人民大廈入面, 正呀!!! 外觀上, 好有古典味道, 入面就幾新呀, 可惜房入面仍然是牛龜電視啦, 影響觀感。

今次唔係超早機, 所以去旅行前終於有教好訓, 哈哈!!! 朝早差不多九點先出門口, 首先落銀行兌錢先, 哈哈。咁遲先兌係因為我懶, 同埋我相信o係香港/大陸酒店個Rate, 兌幾千蚊係相差唔遠的, 所以就算銀行無人民幣, 都無問題, 哈哈, 最緊要係真銀紙就得啦。

兌完錢, 坐地鐵!!! 今次去旅行之前, 我上網用信用卡優惠去買左張機場快線車票, 36蚊咋。所以今次就試下搭地鐵轉機場快線去機場… 感覺上, 我真係鐘意搭地鐵多過搭巴士, 因為時間大致上可以計算到, 不需要預早去等巴士, 只要預返45分鐘, 就可以由鑽石山去到機場了。

到左機場, Check In完, 吃麥當奴啦… 當昨晚擔心緊會唔會因為天氣問題而要Delay或者起唔到飛取消既時候, 感謝主… 天朗氣清呀, 不過… 昨天既不隱定天氣, 令很多航班取消升降, 所以影響到今日既航機起飛… Delay左一個鐘, 終於一飛衝天呀。

雖然飛機Delay左, 但係機師無打算開快D去到目的地呀… 結果我地遲左一個鐘先降落西安。拎完行李, 好快就出去機場搵車去衝景點, 漢陽陵。之前上網研究過, 有人最平試過$160人民幣, 找到車去漢陽陵再去酒店… 可惜我地一落機, 就有人想怒宰我們… 先叫我們上車, 唔講任何價錢, 當我地是大水魚… 再跟我們打錶… 肯定是天價, 到最後一口價, 四百蚊人民幣… 天呀!!! 窮人即走呀… 之後再找到另一架合理既車, $260蚊人民幣… 我眼見講o黎講去都講唔到$200蚊, 唸住出去機場碰運氣, 睇下好唔好彩找到合理車價既車上時, 有個女人撩我地… 講價後$200人民幣成交。感謝主, 中呀。架車o黎到時, 見到唔係正規的士, 係私牌黑車, 心裡有少少驚, 不過… 上就上啦, 哈哈, 最多都係比人賣豬仔加價咋Ma。

去到第一個景點, 漢陽陵, 佢帶左我地去精華遊, 剩係睇個博物館… 一個小時時間… OMG, 我忘記了跟她講時間添, 唉!!! 行完一圈, 剛剛好用左一個小時, 唉!!! 唸住同佢地講價, 加$$$去埋個地下博物館感受下個陵墓, 點知失敗左… 佢地開個價唔靚, 唯有返酒店啦… 帶住一個少少既遺憾離開, 唉!!! 中途我地仲遇到經典既賣豬仔呀, 哈哈!!! 佢地將我地賣左比另一架返西安既車, 佢地就返咸陽, 哈哈!!! 仲唸住上網爬完D文之後, 唔搭錯去咸陽既的士就搞掂, 點知搭私牌車, 都會遭遇同一個情況…

講返漢陽陵既精華遊先, 我地去左博物館度, 睇左好多陪葬物呀。依度係漢代景帝既陵墓, 史稱文景之治既其中一個皇帝, 好聽D就係用黃老之道, 儲$$$擴充國庫, 實質就係咩都唔做, 哈哈。陵墓入面, 挖左好多泥公仔出o黎呀, 個個都好精緻的, 有好多都無左隻手, 或者張開大擘脾, 自行幻想吧, 哈哈。仲有雞, 牛, 豬等等既泥公仔, 全部都有顏色嫁, 不過都係曾經既事呀, 據大嬸講, 保養唔好, 所以就甩晒色… 合理的, 現代中國技術根本就無保護過D文物啦… 剩係識收入場費, 收地貪污, 又點會唸去保護呢… 美其名加價, 實質落入自己袋, 真係狗賊, 哈哈。65蚊入場票… 200蚊兩個人車資

精華遊完, 本來我真心想去個地下博物館, 著住腳套, 進入地下陵墓去感受個古代建築, 同埋親眼去看泥土入面既陪葬物, 可惜… 柒左無講到時間… 唯有返酒店啦。

返到酒店, 正呀!!! 大陸5星酒店, 即係自動減1星, 等於香港4星酒店… 都好正呀。今次住既西安豪華美居人民大廈, 係民國建築, 歷史味重, 算是一座復修既近代文物啦。外面一睇就已經好似返左民國時代既政治中心地區, 入到去, 不俗既大堂啦, 上到房, 幾大幾靚有少少情調既房間, 有個玄關位分隔洗手間同埋睡眠區, 張床好舒服, 間房既大小都算OK大, 廁所幾靚又乾淨, 正呀。

返左房, 坐左陣, 擺好個陣後就衝左去第二個景點. 鐘鼓樓去欣賞市中心既繁榮一面, 講到繁榮, 點都比唔上香港, 但作為一個古都, 市中心既建築, 都有D古都FEEL, 水泥既建築物, 加上傳統既石屎飛簷屋頂, 已經好古典了。夜晚影鐘樓鼓樓, 真係好靚好Sharp呀。依度既鐘樓鼓樓, 係明代朱元璋時期既建築… 雖經歷代重修, 但依兩座木建築, 能夠經歷文革洗禮, 繼續站立在西安大地上, 真係好了不起呀。上到去, 除左站在高處睇夜晚景色外, 真係無咩特別野睇… 60蚊聯票

睇到八點幾九點, 落返大街, 行去回民街睇下手信, 去檢視下手信既價格。結果發現… 兵馬俑公仔好樣衰, 同埋比想像中平無限咁多, 5蚊隻… 即時打消購買既念頭。哈哈, 行多陣, 就去左廟街Feel既地方, 見到好多人賣狗頭枣, 即係好大粒既紅枣…  又或者係核桃… 仲有好多既雞羊肉串… 羊肉夾饃… 不過實在太污濁了, 所以我地都唔敢試呀… 最後搵左好耐, 終於搵到間似D樣既地方食野… 吃左驢肉, 好味道, 哈哈。食飽左, 就行返酒店… 帶著少少遺憾, 去結束第一日既旅程。

08:50am 出門口
09:05am 荷里活廣場恆生銀行兌換人民幣
09:20am 鑽石山地鐵站
09:45am 青衣地鐵站轉機鐵
10:00am 香港國際機場
10:45am 機場禁區麥當奴早餐
11:25am 閘口
12:05pm 上機
13:05pm 香港起飛
15:35pm 西安降落
15:50pm $200 黑車 – 經漢陽陵再返西安豪華美居酒店
16:25pm 漢陽陵
17:25pm 起程回酒店
18:00pm 西安豪華美居酒店
19:00pm 衝景點
19:15pm 步行至鐘樓
19:45pm 鐘樓
20:45pm 鼓樓
21:45pm 晚飯
22:15pm 步行回酒店
22:30pm 酒店